Wednesday, November 4, 2009

Wednesday, October 21, 2009

LALIM

Ayaw kong magsimula ang dilim,
ayaw kong sa sulok ng patalim,
tanawin kang puno ng panimdim.

Sinasalimpan ang bawat tikim
sa lipstick mong kumapal, sa lihim
ng kindat na nagtago sa dilim.

Friday, October 16, 2009

AGOS Tula (Para sa mga naging estudyante at kasalukuyang estudyante)

Sinabayan ko ang inyong agos,
pagkat minsan din akong nagpatangay
sa ilog na malawak
na kailan lang ay tinahak.
Kinukulong ito sa apat na sulok,
minsa’y nakakatihan,
minsa’y umaapaw.

Binihag ng tubig ang inyong kaluluwa.
Ikinalat ang daloy ng kaalaman
na nalaman at pilit pinag-aralan.

Sampu ng mga tilamsik na minsan
ding nawalay, kayo’y hahampas at tatalsik
sa totoong talinghaga ng buhay.
Ngunit magtatampisaw kayo sa haraya
nitong laksa-laksang layaw.
Bibingwitin ang diwa ninyong
kumakawala pa lamang sa karupukan.

Mahahati ang daloy ninyo
sa dalawa, tatlo, apat , lima o higit pa,
hanggang ang daloy ay pumaroon pa sa lawak
na magdurugtong
sa daloy ng iba.

Maaaring may sasabay pa sa inyong agos,
ngunit ikintal na ang pagpapatangay
sa pusod ng agos ay hindi panlilimos.

Hahangaan kita kung ang daloy mo’y mapahaba,
at sinunod na ang simula ay mayroong
pagtatapos na hindi natatapos.

Iba na ako kung iba sa nakasanayan at tradisyonal,
dahil ang agwat nati’y madadangkal din
ng talampakan.

Yumakap kayo sa panahong niyakap kong
maghasik ng kaalaman, karanasan, biruan, kalituhan,
katatawanan at kakulitan.

Damhin ang yakap!

Isipin,
Unawain,
Pakinggan,
Sabihin,
Basahin,
At isulat.

At sa pagsulat ninyong nagwiwikang:
Sir, magaling kang magturo,
iyon ay dahil,
magaling din ang aking naging guro.

Tuesday, October 13, 2009

HATING SIYUDAD Tula

Nasnas na ang paghihintay.
Nawawala na sa hulog
ang paghahanap,
wala na ang liwanag ng pagtunton
sa daan na dapat landasin
para magbalik ka sa akin.

Nasnas na ang pagsasaliksik.
Hindi na kita maibabalik
kung hindi na sariwa
ang mukha mo
na hindi naman mukha ng mga alamat
sa mga daan ng hating siyudad.

Nasnas na ang paglilimi.
Hindi na kita magugunita
na madalas kong ginagawa.
Hindi na isisilid sa isip
ang mga bagay
na ikaw ang nananatiling
mukha.

Thursday, October 8, 2009

MIYUKI (Ang Paglalarawan)

saltik: ikaw ang di hibíng
kapalarang pumailanlang

paltik: ikaw ang niyebeng
humalik sa langit

lagitik: ikaw ang babaeng
dahilan ng aking kasaysayan

pitik: matayog ang tadyang
na iyong pinaghugutan

lintik: kumapal ang kimpal
na ulap hanggang sa di na kita maaninag

Thursday, September 24, 2009

Tuesday, September 22, 2009

PAGHAHANAP SA PANAGINIP

Umpisa…
Sa isip ng matalino’y
bumalik itong anino
ng poot na nabarino.

Pumihit…
Malaya ang bawat ngiti
sa pisngi, bawat pighati
sa puso na hinahati
hanggang sa hanggahan, pati
bituin, nakipagbati.

Naalimpungatan…
Sa panahong sumasaltik
itong bawat panaginip
hindi mapigil ang halik,
sa panahon ng pag-idlip
kailangan kaya babalik?

Tuesday, September 15, 2009

KAILANGANG MAGTAGO SA LIWANAG Tula

Hindi ko na masipat
ang mga bagay-bagay
tungkol sa pinagsimulan
ng aking kahibangan.

Bakit sa musmos kong isip
nakitaan kita ng niyebeng
bumabalik sa langit,
kung saan ito nagmula
doon din ito natatapos.

Sa bawat pagsubaybay
sa kilos mo't galaw,
sa ngiting kasinliwanag
ng musa ng mga paliwanag,
na hindi ko naman magagap,
bakit ko kailangang magtago?

Kapag maliwanag na ba sa akin
ang bawat sinag ng iyong mukha,
makikita ba kitang nagliliwanag
na parang lampara sa gitna ng gubat?

O kailangan bang maliwanag sa akin
ang bawat kilos mo
na sa iba naman ibinabaling?

Sa liwanag kita makikita
pero sa dilim ako nakatago,
gusto ko kasing nakalihim sa iyo
ang sinag ng aking puso.

Kung ibaling mo ang iyong mukha
sana sa liwanag mo ako makita,
habang pumapatak ang mga niyebe
sa aking mukha.

Monday, September 14, 2009

Sunday, September 13, 2009

MIYUKI (Ang Paghahanap)

Para ka bang bagay
na kung kailan ko hinahanap
saka hindi ko masumpungan.

Subukan kaya kitang kalimutan.

Para ka pa rin bang bagay
na kapag di ko na hinanap
saka ko makikita?

Para ka bang bolpen,
huminto lang akong saglit
sa pagsusulat
di na kita mahagilap?

O para ka pa rin bang bolpen
na pinagtyagaang hagilapin,
makikita lang pala kitang nakasangyat
sa aking tenga.

Para ka bang krokis sa papel,
na kapag kailangang ko nang husayin
ay hindi ko na matagpuan?

O para ka pa rin bang krokis sa papel
na matatagpuan ko na lang
na nakasingit sa librong
lagi kong binabasa.

Sana bolpen at krokis sa papel ka na lang,
dahil kahit di sadyain
makikita ko pa rin.

Friday, September 11, 2009

LAGING MAY ANYAYA ANG DILIM

Laging may anyaya ang dilim,
Lambong itong nagsasaklob
ng laksang panimdim.

Mapang-akit ang dilim,
Nagtuturo itong dumilat
sa lagim at rimarim.

Lumakad ka man
Ididikta ng dilim
ang paninging itim.
Tumakbo ka man
mas matulin ang dilim,
agad itong makararating.

subukin mang umalala
nang taimtim

lahat, kahit salamisim
handa nitong saiirin, burahin.

Tuesday, September 1, 2009

Monday, August 31, 2009

Saturday, August 1, 2009

IKALAWANG PALIHANG ROGELIO SICAT

Ikalawang Palihang Rogelio Sicat:
DFPP 2009 Pambansang Palihan sa Malikhaing Pagsulat
Kolehiyo ng Arte at Literatura, Unibersidad ng Pilipinas Diliman, Lungsod Quezon

25 Abril 2009

Nakapili na ang Departamento ng Filipino at Panitikan ng Pilipinas (DFPP), UP Diliman ng 15 manunulat na lalahok sa Ikalawang Palihang Rogelio Sicat: DFPP 2009 Pambansang Palihan sa Malikhaing Pagsulat.

Ipinangalan sa iginagalang na manunulat at gurong Rogelio Sicat, tanging palihan ito sa bansa na nakatuon sa paggamit at paglinang ng Pambansang Wika sa malikhaing pagsulat.

Gaganapin ang palihan sa pakikipagtulungan ng Pamahalaang Panlalawigan ng Nueva Ecija sa 27-31 Mayo 2009 sa Palayan City, Nueva Ecija.

Ang mga napili ay sina:

TULA
Patrick Noah R. Bautista, Paul Joseph Corpuz Belisario, Harold John C. Fiesta, Colleen S. Gadon, Walther Neil L. Hontiveros, Soleil Erika C. Manzano, Princess F. Marasigan at Christian Tablazon;

KUWENTO
Patrick Lawrence Alzona, Jerome T. Co, Mar Anthony Simon Dela Cruz, Sierra Mae Paraan at Romeo Peña.

DULA
Anna Levita T. Macapugay at Marco Antonio Rodas.

Ang mga kasapi sa Kaguruan ng Palihan ay sina: Jesus Manuel Santiago (panauhing guro); Jun Cruz Reyes, Roland Tolentino, Glecy Atienza, Luna Sicat-Cleto, at Romulo P. Baquiran, Jr; at mga direktor ng palihan na sina Jimmuel Naval at Reuel Molina Aguila.

********

Ikalawang Palihang Rogelio Sicat:
DFPP 2009 Pambansang Palihan sa Malikhaing Pagsulat
Kolehiyo ng Arte at Literatura, Unibersidad ng Pilipinas Diliman, Lungsod Quezon

25 Abril 2009

G. Romeo Peña

Pagbati!

Napili kayo bilang isa sa 15 manunulat na lalahok sa Ikalawang Palihang Rogelio Sicat: DFPP 2009 Pambansang Palihan sa Malikhaing Pagsulat; gaganapin sa 27-31 Mayo 2009, Palayan City, Nueva Ecija.

Kaugnay nito, hinihiling naming matugunan ninyo ang sumusunod hanggang ika-3 ng Mayo:

kumpirmasyon ng inyong pagdalo;
pag-e-mail ng inyong mga naging lahok (may mga diskette/cd na hindi mabuksan);
elektronikong bersyon (scanned) ng larawan;
nilagom na tala sa sarili (hindi lalampas sa limang pangungusap)


Ang ilan pang detalye hinggil sa palihan ay ipapadala rin namin sa e-mail sa susunod na linggo. Lakip din nito ang mga makakasama sa palihan.

Muli, ang aming pagbati.


Sumasainyo,


Dr. Jimmuel Naval at Prop. Reuel M. Aguila,
Mga Direktor ng Palihan